Жекешелендірудің 2016-2020 жылдарға арналған кешенді жоспарының ағымдағы жылдың бірінші жартыжылдығының нәтижелері мемлекеттің ел экономикасына қатысуын қысқартып, жаңа салаларда жеке бизнестің дамуына серпін береді. Қаржы министрлігі мемлекеттік мүлік және жекешелендіру комитеті төрағасының міндетін атқарушысы Қалымжан Ибраимов 2016-2020 жылдарға арналған Жекешелендірудің кешенді жоспарының ағымдағы жылдың бірінші жартыжылдығының нәтижелері бойынша Жекешелендірудің кешенді жоспарына енген 887 объектіден 502-сі сауда-саттыққа шығарылып, оның 421-і сатылып, сату бағасы 216 млрд теңгені құраған.
Оның ішінде, 29 республикалық меншік объектісі болса оның сату бағасы – 26 млрд теңге. Ал 229 нысан коммуналдық меншік объектісі. Оның сату бағасы – 49 млрд теңгені құрап отыр. Бұған қоса, 163 ұлттық холдингтердің объектілері шығарылып, оның сату бағасы –141 млрд теңгені құраған. Сонымен бірге Кешенді жоспардың 63 топ объектісінің 15-сі 110,5 млрд. теңгеге сатылып отыр. Айта кетерлігі, 266 объекті қайта ұйымдастырылу және таратылу сатысында. Ал ағымдағы жылдың бірінші жартыжылдығында сауда-саттыққа шығаруға 104 объекті жоспарланып отыр.
Жекешелендіру процесі бірқалыпты тұрақты жүйеде жүргізіліп келеді. Айта кетерлігі, 2015 жылы енгізілген сауда-саттықты электрондық форматта өткізу туралы норма жекешелендіру процесін одан әрі жеделдете түскен. Бұл сауда-саттыққа қатысу үшін электронды өтінішті беру-қабылдау кезеңінен жеңімпазды анықтау кезеңіне дейін уақытты үнемдейді. Бұдан басқа, осы жылдан бастап сауда-саттық нәтижелері бойынша сатып алу-сату шарты да электронды цифрлық қолтаңба арқылы электрондық форматта жасалынып отыр.
Сонымен қатар, Жекешелендірудің 2016 – 2020 жылдарға арналған кешенді жоспарын орындау бойынша бүгінгі күні бірнеше жұмыстар жүргізілуде. Бірінші кезекте, Ұлттық экономика министрлігі қормен бірлесе отырып Қордың компанияларын IPO-ға шығаруды қамтамасыз ету үшін түзетулер пакетін әзірлеуге көшті. Қор тобына кіретін ұлттық компаниялардың көпшілікке арналған акцияларын орналастыруды жүзеге асыруға кедергі келтіретін заңнамалық шектеулерді жоюға бағытталған өзгерістер енгізілмек.
Бұдан басқа, Мемлекет басшысының тапсырмасын орындау мақсатында Үкімет ағымдағы жылғы 4 маусымда ұлттық холдингтер мен компаниялардың активтерін бәсекелес ортаға беруден түсетін қаражатты Ұлттық қорға жіберу тәртібін бекітті. Жекешелендірудің 2016 – 2020 жылдарға арналған кешенді жоспарына жекешелендіруге жататын ұйымдардың санын 38 бірлікке ұлғайту бөлігінде толықтырулар енгізуді көздейтін қаулы жобасын әзірледі. Қазіргі таңда қаулы жобасы мемлекеттік органдармен келісілуде.
