Саудадағы кәсіпкерлерге қысқа мерзімге жеңілдетілген несие беру бағдарламасын енгізу қажет. Мұндай бастаманы «Nur Otan» партиясының PRIMARIES — 2020 ішкі партиялық іріктеуіне қатысушы Қайырлы Таукен сайлауалды бағдарламасына енгізіпті.
Кез келген мемлекетаралық қарым-қатынас халықаралық сауда арқылы жанданатыны сөзсіз. Сол сияқты елдің дамуы да саудамен тікелей байланысты. Ендеше, сауда саласындағы кәсіпкерлерді қолдаудың да маңызы ерекше.
Мысалы, 2017-2021 жылдарға арналған«Еңбек» нәтижелі жұмыспен қамтуды және жаппай кәсіпкерлікті дамыту мемлекеттік бағдарламасы бар. Осы бағдарлама аясында шағын және орта бизнес өкілдеріне 6% жеңілдетілген несие беріледі. Бірақ, бұл бағдарламаға сауда саласындағы кәсіпкерлер ілінбейді. Өйткені, талабы мен шарты өзгеше. Сондықтан, сауда саласындағы кәсіпкерлерді қолдауға бағытталған жаңа бағдарлама қажет.
«Қазір біздің саудагерлердің арасында қолда бар дүниесін ломбардқа өткізіп, кәсіп бастағандар көп. Ал, ломбардтың проценті өте үлкен. Бірақ, саудадағы кәсіпкерлер қысқа мерзімге алып, тез қайтарып тастауға тырысады. Бұдан бөлек, олар микроқаржы ұйымдарынан қарыз алады. Олар да жылдам қаржыландырғанмен пайыздық ставкалары өте жоғары. Егер, саудагер жұмысқа шыға алмай қалса айыппұл үстемесі қосылады. Бұл өте күрделі мәселе. Егер ел экономикасының дамуына үлес қосатын осы шағын және орта бизнес өкілдері, соның ішінде сауда саласындағы кәсіпкерлер дейтін болсақ, олардың қаржыға деген қолжетімділігін қамтамасыз етуіміз керек», — дейді Қайырлы Таукен.
Қайырлы Кеңесбекұлының айтуынша, саудадағы кәсіпкерлерге несие беретін бағдарлама әзірленуі қажет және ол төмен пайызбен қысқа мерзімге берілгені дұрыс (қысқа мерзімге айналымдағы тауарларды кепілге қою арқылы немесе сауда компанияларымен жасалған шарт бойынша қаржыландыруға болады. Бұрын Еуропа қайта құру және даму банкінде осындай бағдарлама болған). Ол болмаса, сауданы басым салалар қатарына қосып, 6%-бен несие беру керек.
«Өйткені, өндірістегідей емес, саудадағы кәсіпкерлерге қаржы бір тоқсанға ғана керек болуы мүмкін және қаржы жылдам қайтарылады. Бұл мемлекетке де тиімді болар еді. Сондықтан, мен сайлауалды бағдарламамда саудадағы кәсіпкерлерді қолдауға басымдық беріп отырмын», — дейді Қайырлы Кеңесбекұлы.
Бүгінгі таңда елдегі жұмыссыз азаматтардың санын азайту және халықтың тұрмысын жақсарту мемлекеттік деңгейдегі маңызы бар мәселе. Сол мақсатқа жетудің ұтымды жолы кәсіпкерлікті жан-жақты қолдауда жатыр.
