Жақында халықаралық атты әскерилер арасында өтетін байрақты бәсекеде Қазақстан Республикасының Қарулы күштерінен де үміткерлер қатысады деп күтілуде. Осы жолғы додада еліміздің атынан «Юг» әскери бөлімі, арнайы барлау ротасының (альпілік) сержанты Жапарғалиев Нұрғали Махамбетғалиұлы бақ сынамақ. Бүгін біз қажырлы дайындық үстінде жүрген сержантпен жарыс алдында әңгімелестік.
– Нұрғали, өзіңіз туралы айтып беріңізші. Неге өз өміріңізді армиямен байланыстыруға шешім қабылдадыңыз? Жастарға қандай кеңес бересіз?
– Мен үшінші сынып сержанты Жапарғалиев Нұрғали Махамбетғалиұлы. 1993 жылы Жамбыл облысында дүниеге келдім. Бала кезден Десанттық шабуыл әскеріне қызығып жүрдім. Арманым орындалып, 18 жаска толғанда Қапшағай қаласындағы N 35 Десанттық Шабуылдаушы Бригадаға түсіп, өзімнің азаматтық борышымды өткердім. Содан кейін әскери өмірге деген қызығушылығым одан әрі арта түсті. Қазіргі уақытта туған жерімдегі Таулы егірлі полкында қызметімді жалғастырып келемін. Өз өмірін армиямен байланыстрығысы келетін жастарға айтарым – Отан қорғау әр азаматтың борышы. Әскерде болған азамат өзіне бекем, төзімді ер болатыны туралы нық айта аламын.
– Жақында Сіз атты марафон «АРАФТ»-қа қатысасыз. Жарысқа дайындық қалай жүріп жатыр? Өткен жылғымен салыстырғанда қандай ерекшеліктер бар? Пандемия ережелерге әсерін тигізді ме?
– Мен 2019 жылы Монғол елінде болған атты марафонда өз бағымды сынап іріктеуден өттім. Жарыста 2-ші иеленіп, өте ерекше сезімде болдым. Осы жылы болатын жарыста да іріктеуден өттім, бірақ алдынғы жарысқа қарағанда өзгерістер бар. Дайындық өте жақсы, нәтижелі өтіп жатыр деуге болады. Қазақ елі ежелден атқа мінген халық , сол себептен, қазақ жігіттеріне мұндай жарыстар еш қиындық туғызбайды деп ойлаймын. Пандемияға қарамастан, барлық сақтық шараларын ұстана отырып жаттығуларымызды жалғастырудамыз.
– Сайыста сіздер Қазақстан Қарулы Күштері Ұлттық құрамасының атынан шығасыздар. Бұл үлкен жауапкершілік. Жарыс алдында толқу бар ма?
– Қазіргі таңда толқу жоқ , бірақ жауапкершілік сезімі бар. Халықаралық жарыс болған соң өз намысымызды бермеуге тырысамыз.
– Халықаралық жарысқа қатысатын басқа үміткерлерге не тілейсіз?
– Басқа үміткерлерге сәттілік тілеймін. Еш жарақатсыз аман-есен өткізіп, отбасыларына оралсын. Бұл жарыста қатысушылардың әртүрлі жарақат алып қалу ықтималдылығы жоғары.
– Рахмет. Сәттілік сізге.