Жақында, яғни, қарашаның 8-9 күндері Қоғамдық келісім комитеті жанындағы Дін мәселелері жөніндегі Республикалық ақпараттық-түсіндіру тобының (РАТТ) мүшелері тұрғындар арасында маңызды кездесулер өткізу үшін Жезқазған, Сәтбаев қалаларында болды. Моноқалаларға іс-сапармен келген топ құрамында белгілі дінтанушы Тұрар Әбуов, Қазақстан мұсылмандары діни басқармасының Насихат және қоғаммен байланыс бөлімінің маманы Хамзат Әділбеков, ҚМДБ-ның “Әйелдер-қыздар” секторының меңгерушісі, исламтанушы Ақбөпе Тілегенова болды.
Жезқазған қаласынан бастау алған іс-шаралар Сәтбаев қаласында да өз жалғасын тауып, ҚМДБ өкілдері Х.Әділбеков мешіт имамдарымен және діндар азаматтармен кездесу жүргізсе, исламтанушы А.Тілегенова деструктивті ағымның жетегіне түскен қыз-келіншектермен жекелеген кездесулер мен мешіт жамағатымен жүздесулер болды.
Бүгінде елімізде радикалды діни топтардың қатарын ер кісілер ғана емес, әйел кісілер де толықтырып жатқаны жасырын емес. Әйел өзімен қоса балаларын да теріс бағытқа тәрбиелейтіні анық. Қысқаша айтсам, сол деструктивті ағымның жетегіне түскен қыз-келіншектерді оңалту, отбасылық проблемалары бар әйелдерге психологиялық көмек беру маңызды, – дейді А.Тілегенова.
Ө.А.Байқоңыров атындағы Жезқазған университетінің, Жезқазған индустриалдық-гуманитарлық колледжінің және Сәтбаев индустриалды колледжінің студенттерімен, ұстаздар қауымымен кездескен Тұрар Әбуов жастарға мемлекеттің зайырлылық ұстанымдары, діни теріс ағымдардың қоғамға кері әсері, діни экстремизм мен терроризмді насихаттайтын идеологиялардың таралуын ауыздықтау, дін мен дәстүр тақырыптарында кеңінен сөз қозғады. Жастардың әлеуметтік желілер арқылы таралатын әртүрлі діни уағыздарға қырағылықпен қарау қажеттілігіне де кеңінен тоқталды.
Сонымен қатар Жезқазған қаласы бойынша мемлекеттік кірістер басқармасының, Жезқазған қалалық жедел медициналық жәрдем станциясының қызметкерлерімен, сондай-ақ Сәтбаев қаласы әкімдігінің мәжіліс залында мемлекеттік қызметкерлермен, Сәтбаев қаласында Достық үйінде мектеп директорларымен, дінтану пәнінің мұғалімдерімен кеңінен кездесулер өтті. Кездесу барысында РАТТ мүшесі Т.Әбуов қоғамдағы зайырлылық сана-сезімін нығайту, азаматтар мен қоғамды сыртқы әртүрлі жалған ақпараттан қорғауды қамтамасыз ету және халық санасында еліміздің болашағын зайырлылық қағидаларына негіздеу қажеттілігі турасында қатысушыларға тың ақпарат берумен қатар, оларға үлкен серпін берді. Сондай-ақ, дінтанушы Тұрар Түгелұлы кездесулер барысында Дін саласындағы мемлекеттік саясатының 2017-2020 жылдарға арналған тұжырымдамасынада кеңінен түсіндіре кетті.
Елбасының жарлығымен бекітілген Тұжырымдама ішкі және сыртқы тұрақтылық пен қауіпсіздікті қамтамасыз етуге бағытталып, экстремистік сипаттағы дін атын жамылған ағымдардың бүлікшіл әрекеттеріне тосқауыл қоюды мақсат етеді. Діни алауыздық – мемлекеттің зайырлы қағидаттарын жоққа шығарып, дәстүрлі құндылықтарға қауіп төндіруде. Тұжырымдамада мемлекет пен дін арасындағы қарым-қатынас, діни экстремизм мен терроризмнің алдын алу және т.б өзекті мәселелер қарастырылған – деп атап өтті.
Дін саласындағы мемлекеттік саясатының 2017-2020 жылдарға арналған тұжырымдамада 2018 жылы халықтың 89 пайызы, ал 2020 жылы халықтың 91 пайызы мемлекеттің дін саласындағы саясатын қолдайды деген межелі көрсеткішке жетуді мақсат қойып отырғандығын айта кетейік.
