Бүгін Қазақстан бойынша сайлауалды үгіт-насихат жұмыстарының екінші күні. Осыған орай Жаңаөзен қаласының мұнайшыларымен кездесу ұйымдастырылды. Қалалық мәслихат депутаттығына кандидаттар Болат Бекжанов пен Рзабек Сарманов және қалалық сайлауалды штаб мүшесі Жеңісбек Сүлейменов «Өзенмұнайгаз» АҚ-ға қарасты «ТрубРемЦентр» ЖШС-да болып, құбыр цехының жұмысшыларын партияның сайлауалды бағдарламасымен таныстырды.
Алдымен 2020 жыл әлем халқы үшін үлкен сынақ болғаны айтылып, көптеген мәселелерге жіті мән беріліп, адамның өмірі мен денсаулығы – мемлекет үшін маңызды екенін жеткізді. Карантин шараларына қарамастан, партия өз жұмысын адал жалғастыруда.
Әлемді жаулаған індет кезінде, Елбасы тапсырмасымен республика көлемінде «Birgemiz» акциясы жүргізіліп, нәтижесінде облыс бойынша әлеуметтік әлсіз топқа жататын 7 санаттағы 28304 адамға қаржылай көмек көрсетілді. Одан бөлек жеке кәсіпкерлер, ерікті тұрғындардың көмегімен 10 мыңдай отбасыға азық-түлік салынған себеттер үлестірілді. Ел басына қиын қыстау кезең туғанда халықпен бірге болған партия, алдағы уақытта да мемлекетіміздің дамуы жолында бірге болуды нақты мақсат етіп қойып отыр. Осы орайда жиынға қатысушылардан партия атынан ұсынылған кандидаттарды қолдауға шақырды.
Сонымен қатар жиында «Nur Otan» партиясының «Жаңаөзен қаласын дамытудың 7 басым бағыты» таныстырылды. Құжатта қаладағы жұмыссыздық мәселесі басты назарға алынып, қала халқы жұмыспен қамтылуы үшін жаңа жұмыс орындарын құру, қолданыстағы жұмыс орындарын сақтау көзделуде. Кен өндіру өнеркәсібін одан әрі дамыта отырып, өңдеу өнеркәсібіне, көлік пен логистикаға, агроөнеркәсіптік кешен мен туризмді дамытуға басымдық берілмек. Партия Жаңаөзен қаласының 2021-2025 жылдарға арналған Кешенді жоспары аясында жүзеге асырылатын жобалардың іске асуына ықпал етіп, соның ішінде мұнай қалдығынан мазут топырағын тазалау жобасын, жаңа газ өңдеу зауытын салу, арматура цехын құру, шиналарды қайта өңдеу цехын құруды қамтамасыз етеді.
Сайлауалды бағдарламада бұдан бөлек қаланы дамытуға арналған басқа да салалар бойынша негізге алынған жұмыстар баяндалып, қатысушылардың пікірлері, сауалдары тыңдалды. Жауапкершілігі шектеулі серіктестік қызметкері Нұржан Жоламанов Шоғы батыр даңғылындағы жарық мәселесі мен «Мерей» және «Жұлдыз» шағынауданында ғаламтор жылдамдығы нашар екенін жеткізді. Дариға Ұзақбаева «Ақсу» шағынауданы 8-9 көшелерге қойылған қоқыс жәшіктері уақытылы жиналмайды, Асқар Маханов «Өркен» шағынауданда ғаламтор желісінің жылдамдығы нашар, Гүлмира Тілепова «Бостандық» шағынауданында суағарларды реттеу, ойын алаңшаларын жандандыру, тротуар салу ұсыныстарын айтты. Аталған мәселелер бойынша қалалық мәслихат депутаттығына кандидаттар сұрақтарды тиісті мекемелерге жеткізіп, хат жіберіп, бақылауға алатындарын мәлім етті.
«Nur Otan» партиясының Маңғыстау облыстық сайлау қорынан төленді
Рекомендуем также
