Еліміздегі интернет-сатып алушылардың саны өткен 7 айда 1,5 млн адамға жеткен. Бұл былтырғы жылмен салыстырғанда 11 процентке артық. Электронды сауда нарығының ілгері жылжуына кәсіпкерлерге арналған фулфилмент орталықтарының ашылуы да оң ықпал етіп отыр. Кеше Астанада алғаш ашылған фулфилмент-орталықтың ашылуына Премьер-министрінің орынбасары Асқар Жұмағалиев қатысып, интернет дүкеннің жұмысымен танысты, деп хабарлайды Toppress.kz.
−Шағын жəне орта кəсіпкерлікті Елбасының өзі қолдап отыр. Соның негізінде бүгінде салық кодексіне өзгерістер енгізілді. Аталған өзгерістерге сəйкес кəсіпкерлердің салық төлеуі жеңілдеді. Оның электрондық саудаға да қатысы бар, сондықтан үкімет сіздерден нəтижелі жұмыс күтеді. Ең бастысы, ел экономикасын дамытуда жаңа жұмыс орындарының ашылуы, бұл — қуантарлық жағдай,- деді А. Жұмағалиев.
Алғаш ашылып отырған интернет-дүкен орталығында тауарды қабылдау мен өңдеуден бастап, буып-түю, сақтау жəне оны иелеріне жеткізу секілді қызмет түрлері бар.
Қазпоштаның Астанада алғаш рет ашылған кезекті жобасы кəсіпкерлердің тауарды иесіне жеткізуін жеңілдетеді. Одан бөлек, қоймалармен, байланыс орталықтарымен, логистика жəне қызметкерлер құрамымен қамтамасыз ету шығынын азайтуға мүмкіндік бермек.
Еліміздегі электронды сауданы дамытудың 2018-2020 жылдарға арналған жол картасында осындай орталықтарды ашу жоспарланған болатын.
−Интернет-сауда мәдениетінің дамуымен қатар, қазақстандықтардың оны жеткізіп беруге деген талабы да артты. Қазір біз жеткізу мерзімдерін қысқарту бойынша жұмыстар жүргізіп жатырмыз, халықаралық курьерлік және логистикалық компаниялармен және пошта операторларымен ынтымақтастық орнаттық. ТМД-да алғашқы болып 2017 жылғы тамызда ҚХР-дан Қазақстанға теміржолмен сәлемдеме тасымалдауды жолға қойдық. Бұл
жеткізу мерзімін 2 есе (60 күннен 25 күнге дейін) қысқартты, жеткізу құнын да 2 есе қысқартып, тасымалдың тұрақтылығын арттырды. Теміржол бағытынан өзге біз ҚХР-дан Қазақстанға чартерлік әуе тасымалын іске қосу жұмыстарын жүргізіп жатырмыз. Бұл жеткізу мерзімін 25 күннен 7-15 күнге дейін қысқартуға мүмкіндік береді. Сондай-ақ біз халықаралық транзитті дамыту жоспарында бондтық қоймаларды құру жұмыстарын белсенді түрде жүргізіп жатырмыз,- деді «Қазпошта» АҚ Басқарма төрағасы Сәкен Сарсенов.
Қазіргі күні жалпы ауданы 3 мың шаршы метрлік қоймада 20 интернет-дүкеннің 600 мың тауары сақталған, биылдың өзінде қоймадан 177 мың тауар жөнелтіліп отыр.
