3 наурызда Нұр-Сұлтан қ., Marriott Hotel Astana қонақүйінде Қазақстан Республикасының Орталық мемлекеттік органдары мен Нұр-Сұлтан қаласының жергілікті органдары бюджет ақпаратының ашықтығы, есептілігі және тиімді жұмсалуы жөнінде талқылау өткізеді. Шараның ұйымдастырушылары – Сорос-Қазақстан Қоры және "Zertteu Research Institute" қоғамдық қоры, деп хабарлайды Toppress.kz.
Бюджет ашықтығы соңғы жылдары өзекті тақырыпқа айналды. Мемлекеттік органдарға сенім бюджет қаражатының тиімді жұмсалуына тікелей байланысты. Қазақстан Республикасы отандық туризмді дамытуға, жұмыссыздық деңгейін төмендету мақсатында кәсіптік оқыту бағдарламасына, аула клубтарын көбейтуге әр жылы миллиардтаған қаржы шығындайды. Өкінішке орай, бұл салаларда алға жылжу байқалмайды. Қаржының қалай, қайда, қаншалықты тиімді жұмсалып жатқаны туралы ақпарат ашық емес.
"Zertteu Research Institute" зерттеулері бойынша, бюджет процесінің ең жабық кезеңдері – жоспарлау мен қарау, бекіту. Жоспарлау кезеңінде бюджет жоспары көпшілікке таныстырылмайды, жергілікті азаматтар бюджет жобасын әзірлеу, талқылау, қалай да бір ықпал ету жұмыстарынан тыс қалады. Жергілікті мәслихаттар қоғамды бұл процеске араластыруға құлықсыз. Бюджет жобасын жариялап, ол туралы қоғамды ақпарттандыру, қатыстыру жұмыстары жүргізілмейді. Сондай-ақ бюджетті жүзеге асыру процесінде де ашықтық жетіспейді. Нәтижесінде қарапайым азаматтар бюджет қаржысының жұмсалуы, оның тиімділігі туралы хабарсыз.
ҚР Сыйбалас жемқорлыққа қарсы іс-қимыл агенттігі, Ақпарат және қоғамдық даму министрлігі, Мәдениет және спорт министрлігі, Еңбек және халықты әлеуметтік қорғау министрлігі, Нұр-Сұлтан қаласы әкімдігі, Нұр-Сұлтан қаласының Қоғамдық даму басқармасының жауапты мамандары "Zertteu Research Institute" эксперттері мен қоғамның белсенді азаматтарымен бірлесіп, осы сұрақтарды ашық талқылайды.
Сонымен қатар сұхбат алаңында Сорос-Қазақстан Қоры ұйымдастырған "Open Budget Fellowship" жобасының түлектері Назерке Абибулла, Халима Тәжіқұл, Жанар Оспанова және Альфия Шамаева өздерінің зерттеу тақырыбы бойынша баяндама жасайды. "Қазақстан туризмі: брендинг пен имиджге бөлінетін қаржының ашықтығы", "Нұр-Сұлтанның аула клубтары: ашықтығы мен тиімділігі", "Нұр-Сұлтан қаласы Қоғамдық даму істері басқармасы" мемлекеттік мекемесінің мемлекеттік әлеуметтік тапсырысы тәсілімен іске асырылатын жобаларды орындау барысының ашықтығы" және "БҚО Ақжайық ауданында жұмысшы кадрларды қысқа мерзімді кәсіптік оқытуға бөлінген қаржының тиімділігі" жөнінде мүдделі тараптар мен қоғам белсенділері талқылау өткізеді. Зерттеулердің толық нұсқасын Сорос-Қазақстан қорының www.soros.kz сайтынан таба аласыздар.
Шараға қатысуға тілек білдірген журналистер жоба үйлестірушісі Ғалымжан Оразымбетпен +77075641454 және Алтынай Нуркеевамен +7 707 854 44 06 номері арқылы байланысуын өтінеміз.