«Танк биатлоны» халықаралық жарысының қарсаңында, әскери қызметтің қыр-сыры туралы бүгін аға лейтенант, Аягөз қаласы, N 10810 әскери бөлімінің танк рота командирі Құдайберген Ермахан Сенбіұлымен сұхбаттастық.
— Ермахан, өзіңіз және қызметіңіз туралы айтып беріңіз, әскери қызметке баруға не түрткі болды?
— Мен Оңтүстік Қазақстан облысы, Мақтаарал ауданының тумасымын. 2011 жылы мектеп бітіріп, 2012 жылы Құрлық әскерлері институтының Танк командалық мамандығын таңдап, 2016 жылы бітіріп шықтым. Менің әскери қызметке баруыма түрткі болған бала кезгі арманым еді. Сол арманға жетуге бар күшімді салдым. Бүгінгі күні Шығыс Қазақстан облысы, Аягөз қаласында орналсқан әскери бөлімнің 3 танк батальоны, 7 танк ротасының рота командирі болып қызмет атқарып келемін.
— Биыл сіздер Халықаралық Қарулы күштер ойындары аясында Танк биатлоны жарысында Қазақстан Қарулы Күштерінің намысын қорғайтын боласыздар. Жарысқа дайындық қалай жүріп жатыр? Байқауға барған әріптестер өз тәжірибелерімен бөлісе ме?
— Иә, осы жылы Танк биатлоны жарысына өте қызу дайындық үстіндеміз. Бұл жолы Қазақстан Республикасының намысын жоғарғы деңгейде көрсетеміз деген сенімдеміз. Алдыңғы жылы дәл осы жарысқа қатысқан әріптестер өз тәжірибесімен бөлісіп, маңызды кеңестерін беруде. Жалпы айтқанда, дайындығымыз өте интенсивті өтуде.
— Алдағы байқауға қобалжуды сезінесіз бе? Сыйлықтарға қандай жоспарларыңыз бар?
— Әрине ондай қобалжу әрбір жарыстың алдында болуы табиғи құбылыс. Бірақ, біз өзіміздің дайындығымызға нық сенімдіміз және жүлделі орын алуға ниетіміз зор.
— Соңғы жылдары жастар өз өмірін армиямен байланыстыруға қорқады, қызметтің артықшылықтары туралы айтып беріңізші?
— Соңғы жылдары армияға келіп жатқан жастарда ондай ой байқамадым. Дегенмен әр адамның ойына жеке жауап бере алмаймын.
Бастысы әскери борышын өтеуге келіп жатқан азаматтар Отан алдындағы міндетін жіті түсінеді және оны жүзеге асыруға бар күшін салады. Біздің жұмыста Отанға қызмет етуден артық ешнәрсе жоқ деп ойлаймын. Сонымен қатар, осы жылы әскери қызметкерлердің жалақысының 32 пайызға көтерілуі қуантады және біздің қатарларға жаңа сарбаздардың қосылуына сөзсіз үлесін қосады деп ойлаймын.
Біз әскери борышын өтеп жүрген сарбаздарға ініміздей қарап, қамқор болуға тырысамыз. Соңғы жылдары әскери қызметшілердің тамақ сапасы да жоғарылаған, барлық жағдай жасалған деп айтуға болады. Сол себептен, қорқатын ешнәрсесі жоқ. Әскери өмір азаматтарды шыңдап, бойындағы мықты қасиеттерді күшейтеді, жігерін арттырады.
