"Жастарды рухани-адамгершілікке тәрбиелеудегі және радикалды діни идеологияға иммунитетті қалыптастырудағы әйел ұйымдарының рөлі" тақырыбында өткен семинарда Ақпарат және қоғамдық даму вице-министрі Марат Әзілханов еліміздегі дін саласында әйелдерден құралған ұйымдардың жұмысын жандандыр керек екенін айтты.
Сирияда қаза тапқандардың отбасылары, балалары мен әйелдері бар. Әртүрлі жағдаймен абақтыға түскендердің отбасылары мен әйелдері бар. Одан қалды біздің өңірлерде әйелдер жамағаты барын жасырудың керегі жоқ. Әйелдер өздері бірігіп, жамағат болып жатыр. Ол да белгілі жайт. Бұл кісілер жабық түрде бір-бірімен араласады. Сыртпен байланысы жоқ. Өздерімен өздері жүреді. Қиындықтары жоқ емес. Жұмыс таппай, балаларын балабақшаға орналастыра алмайды. Олармен де жұмыс жүргізу керек. Оқшауланған топтар қоғамнан секем алып, ызаланған жағдайға тап болуы мүмкін. Осындай топтарды жақын тартып, жүйелі жұмыс істеу керек. Бұл бүгінгі қоғам үшін аса маңызды міндеттердің бірі. Қоғамдағы дін саласында бар қауіп қатерлердің алдын алу аса маңызды болмақ, − деді М. Әзілханов.
Оның айтуынша, жалпы елімізде отбасылық, гендерлік мәселелермен айналысатын 77 үкіметтік емес ұйым бар екен. Бірақ көз жүгіртсек, бір-біреуі дін саласына айтарлықтай атсалысып жатқан жоқ. Облыстарда үкіметтік емес ұйымдарға 235 млн теңге бөлінеді. 126 жоба іске асырылып жатыр. Біздің орталықта да отбасылық құндылықтарға байланысты бірнеше жоба бар. Біздің мақсатымыз – діни радикализмнің алдын алу. Бұл салада елімізде қордаланған мәселелер көп. Түйткілі шешілмеген мәселелердің ішінде "Жусан" операциясымен елге оралған әйелдердің тағдыры алаңдауға тұрарлық екенін назарға алды. Алдағы уақытта бұл бағытта жүйелі жұмыс жүргізілуі керек.
Қазір әйел ұйымдары жоқтың қасы. Мысалға алатын ұйым жоқ. Қиындықты өз басынан кешкен я болмаса Сириядағы жағдайды көзімен көріп келген әйелдер қауымы өздері жеке ұйым болып құрылса деген ұсынысым бар. Мұндай топтағы кісілер өздері белсенділік танытып, жұмыс істеп жатқандары бар. Бірақ оларға да белгілі бір алаң керек. Ауқымды аудиторияларға шығуына жол ашу керек шығар. Біздегі ақпараттық түсіндіру топтарымен біріктіріп, бір бағытта жұмыс жүргізуін жандандыру керек пе? Осы сияқты қоғамммен етене байланысқан мәселелер қоғамға керек. Қоғамдағы рухани құндылықтарды сақтаудағы әйелдің ролін дамыту керек, − деді вице-министр.
Жиынға қатысқан теолог-ғалымдар, мемлекеттік орган өкілдері, деструктивті діни ағымдардан зардап шеккен тұлғаларды оңалту саласында қызмет ететін мемлекеттік емес ұйымдар тақырып төңірегінде баяндамалар жасап, туындаған мәселелерді шешу жолдарын ұсынды.