Биылғы жылы Мемлекет басшысы Волонтерлер жылы деп жарияланғаны белгілі. Аталған жыл аясында Қазақстан үшін салалық волонтерлікті дамытатын 7 басым бағыт бойынша жұмыс жасалынып отыр. «Birgemiz: Asyl Mura», «Birgemiz: Bilim», «Birgemiz: Saýlyq», «Birgemiz: Sabaqtastyq», «Birgemiz: Taza Álem», «Birgemiz: Úmit» деп аталатын волонтерлік салалары өз қызметін ойдағыдай атқарып келеді.
Өткен аптада Қазақстан Республикасы Ұлттық академиялық мұражайының кітапхана залында Нұр-Сұлтан қаласы жастар саясаты мәселелері басқармасының тапсырмасымен «Адырна» Ұлттық-этнографиялық бірлестігі волонтерлік қызметпен айналысатын астаналық жастарға арналған «Волонтерлік жобаларды қолдау» шағын гранттар конкурсының жеңімпаздарын марапаттау рәсімі өтті.
Іс-шара барысында жобалары үздік деп танылған 22 волонтер 300 000 теңгеге ие болды. Жеңімпаздар келесі критерийлерге сәйкес іріктеп алынды: жоба өзектілігі, қаржыны бөлу бойынша сметаға сәйкестігі, өміршеңдігі, яғни, жоба қай уақыттан бастап қызмет ете алатындығы. Волонтерлерден бөлек, рәсімге Қазақстан Республикасының қоғам қайраткерлері мен белсенділері, сондай-ақ Ұлттық волонтерлік желінің үйлестірушісі әрі волонтерлердің Республикалық Фронт-офисі менеджері Айсұлу Жұмашова қатысты.
-Ұсынылған жобалар шынымен де креативке толы. Қатысушылардың тырысқаны көрініп-ақ тұр. Жеңімпаздарды анықтау кезінде белсенді талқылар орын алды, себебі жеңуге тұрарлық жобалар көп болды, – деп өз ойымен бөлісті Айсұлу.
Конкурста жеңімпаз болған жобалар келесі айдың ішінде жүзеге асуы тиіс.
«BIRGEMIZ» волонтерлері Республикалық Фронт-офисі еліміздің барлық өңіріндегі волонтерлік жобаларды үйлестіреді.
Айта кетелік, Ұлттық волонтерлік желісі – азаматтар мен заңды тұлғалардың ерікті бірлестігі. 2010 жылы волонтерлік мәдениетті, волонтерлік бастамалар мен қызметтерді азаматтар, азаматтық қоғам институттары, бизнес сектор мен мемлекеттік құрылым арасында құру, қолдау және дамыту мақсатында құрылды.