Нұрлан өткен жылы тоқу бойынша Қазақстанда рекорд орнатқан болатын. Қазақстан рекордтар кітабының рекордтарды тіркеу департаментінің директоры Бақытжан Тастүлеков Нұрланға сертификат табыстайды. Ол көз ілмей 72 сағат бойы мойынорағыш тоқып, Қазақстанның "Киннес" рекордтар кітабына енгенін дәлелдейтін құжатқа ие болды. Мойынорағыштың ені 30 см, ал ұзындығы 43 метрді құраған, деп хабарлайды Toppress.kz тілшісі.
Нұрлан Жартыбеков 2017 жылы ол Жастар корпусын дамыту Zhasproject жобасының грантын иемденген болатын. Оның жобасының негізгі мақсаты халқымыздың ұмытылып бара жатқан мәдени мұрасы – тоқыма өнерін жаңғырту арқылы жастарға қазіргі заманға лайықты сапалы киімдер, бұйымдар жасауды үйрете отырып, болашақта өз кәсіптерін ашға мүмкіндік жасау. Жобаны жүзеге асыру барысында Нұрлан тоқыма үйренемін деушелерге тегін шеберлік сабақтарын өткізді. Нұрланның айтуынша, ол 5 жастан бастап тоқуға үйір болған екен. Төрттан жастан бастап өзінің шағын тоқыма бизнесі болған. Тоқыма бұл әйел затына арналған шаруа емес, егер ер адамдар қаласа, айналысуына болады дейді Нұрлан.
Қазіргі таңда Нұрлан "Балдәурен-Қапшағай" сауықтыру орталығында балаларға тоқымадан сабақ береді. Жұмысынан бөлек уақытта өзінің шәкірттеріне тегін тоқыма өнерін үйретеді. Жұмыстан кейінгі уақытта церебральды паралич диагнозы қойылған балалармен де тегін жұмыс жасайды. Мұның барлығын ол ем болсын, тоқыма арқылы балалар сауығып кетсе деген ниетпен жасайды. Сондай-ақ, қолы қалт еткенде қағаздан мүсіндер жасау өнерімен айналысып, аяқпен сурет салуды меңгерген.
Жалпы Нұрлан Жартыбеков былтырғы көрсеткішімен әлемдік рекордты жаңартқан екен. Тек соны дәлелдейтін өкілдерді АҚШ-тан шақыру керек екен. Ал оның өзі біршама қаржыны талап етеді екен. Айта кетейік, қазір әлемде соңғы рекордты жаңартқан адам 64 сағат ұйықтамай тоқыған Бразилиялық азамат екен. Ал біздің Нұрлан 72 сағат болып тұр. Нұрлан өзі ізденіп, осы бастамасына спонсор іздеп, Қазақстанның атын әлемге шығарсам деген арманы бар. Әзірге алар белес "Орталық Азия таланттар іздейді" жобасы болып тұр. Ендеше, Нұрланға сәттілік тілейміз.