Кез-келген мемлекеттің белсенді буыны, қоғамның қозғаушы күші жастар екені мәлім. Былтыр 5 қазанда мемлекет басшысы Нұрсұлтан Назарбаев "Қазақстандықтардың әл-ауқатының өсуі: табыс пен тұрмыс сапасын арттыру" атты жолдауында 2019 жылды Жастар жылы деп жариялауды ұсынды. "Жастар мен отбасы институтын кешенді қолдау мемлекеттік саясаттың басымдығына айналуы тиіс. Жастардың барлық санатын қолдауға арналған шараларды толық қамтитын әлеуметтік сатының ауқымды платформасын қалыптастыру керек", — деген Елбасы жастар жылында белсенді буынның әлеуметтік статусын көтеріп, жастар тарапынан ұсынылған жобаларға зер салып, қолдау білдіру қажеттігін тапсырды. Осы ретте, қолынан іс келетін жастармен жеке тілдесіп, әңгімеге тартып көрдік, Toppress.kz деп хабарлайды.
Нұрлан Жартыбеков, қолөнерші, "Zhas project" жобасының қатысушысы: Арманым − әлемдік рекорд орнату
−Нұрлан, сізді көпшілік ілмектеп тоқу өнері бойынша алдыңызға жан салмайтын хас шебер екеніңізді біледі. Бүгінде ілмектеп тоқудың шебері атанып, 72 сағат бойына тоқтамастан жұмыс істеп, иірілген жүннен шарф тоқып шықтыңыз. Сіз тоқыған мойынорамасының ұзындығы 35 метрге жетіп, Қазақстанның рекордтар кітабына тіркелдіңіз. Бұл өнер түрімен қашаннан бері айналысасыз?
— Менің жасым 29-да. Алматы облысы, Райымбек ауданы, Тұйық ауылының тумасымын. Маған тоқыма өнерін бірінші сыныпта оқып жүргенімде анам үйретті. Төртінші сыныптан бастап тоқыма бұйымдарымды сатуды кәсіпке айналдыра бастадым. Мектепті тәмамдап, жоғары оқу орнын бітіргеннен кейін де осы кәсіптен қол үзбей, әрі қарай жалғастыруды жөн деп шештім. 2017 жылы наурыз айында ең алғашқы рекордқа қол жеткіздім. Яғни, көзімді байлап жылдамдыққа тоқыдым. 1 минут ішінде 59 ілмек жасап, Қазақстан рекордын жаңарттым. 2017 жылы Білім және ғылым министрлігі және әлемдік банктің ұйымдастыруымен жастарға арналған "Zhas project" бағдарламасына тоқыма өнері туралы жобаны тапсырып 1 000 000 теңгелік грант ұтып алдым. Сөйтіп, 400 жобаның ішінде "Үздік жоба иегері" атандым. КИнЭС-2018 қазақстандық рекордтар кітабына ену үшін 3 тәулік бойы көз ілместен 72 сағатта 43 метрлік шарф тоқып шықтым. Осылайша еліміздің рекордын жаңарттым. Қазіргі таңда қыздың жасауын, киіз үйдің сыртқы жабдықтарын, киіз үйдің ішкі жабдықтары: алаша, киіз, сырмақ, шашақ, сондай-ақ киіз үй сүйектерін жасаумен айналысамын. Көрпе құрап, қыш құмыра жасаумен, зергерлік бұйымдармен айналысқанды жақсы көретін, сонымен қатар, балалардың киімін тоқып, қағаздан да түрлі кескіндер жасаймын. Жасаған бұйымдардың барлығына сұраныс жоғары. Менің жүзеге асырып отырған жобам, негізінен табыс көзі емес, әлеуметтік мақсатта құрылған бастама деп айтуға болады. Яғни, қоғамдағы түрлі әлеуметтік топтар оның ішінде балалар үйі, қарттар үйі, мүмкіндігі шектеулі жандар, көп балалы, тұрымысы төмен отбасыларынан шыққан балаларға қөлөнер түрлерімен айналысуға баулимын.
Бүгінде өзіңіз жақсы меңгерген қолөнердің барлық түрлерін үйретумен де айналысады екенсіз?
— Қимыл-қозғалысы қиындаған, түрлі дәрежедегі сал ауруына ұшыраған балдырғандар үшін тоқымамен айналысудың пайдасы зор екен. Осындай балалармен жұмыс істегенінің нәтижесінде біраз баланың денсаулық жағдайы 20 пайызға дейін жақсарды. Қазіргі уақытта 300-ге жуық шәкіртім бар. Оның ішінде 20-30 пайызы өздерінің жеке кәсібін ашуға мүмкіндік алып отыр. Олардың қатарында жастар көп. Бірі әке-шешелеріне көмектессе, енді бірі жас отбасылар ретінде қалыптасып, кәсіптерін өрге сүйреп отыр. Екі жылға жуық уақыт болды, осы жобаны жүргізіп келемін.
Алдағы жоспарларыңызыбен бөліссеңіз?
— Ендігі арманым – әлемдік ректорд жаңарту. Ол үшін қолымнан келгенін барлығын жасап жатырмын. Толықтай дайынмен деп айта аламын тек, қаржылай қолдау болса, жақсы болар еді. Рекорд орнатуға өтініш беру үшін 800 доллар төлеу керек екен. Оның өзінде менің жұмысымның қаралатыны я қаралмайтыны белгісіз. Егер өткен жағдайда шет елге барып-келуім үшін де қыруар қаржы керек. Дәл қазіргі уақытта менің жобадан табар табысым – 200 мың теңгенің шамасында. Оның жартысын отбасыма жұмсаймын, қалған жартысы жобаға кетеді. Жастар жылында мен сияқты өнерін қару еткен жастарға қолдау болса, нұр ү
