Әлеуметтің әр минуты әлеуметтік желілерге тәуелді болғандықтан, замандастарымыз түрлі гаджеттер мен интернеттің иіріміне түсіп жатыр. Жастар кітаптан қол үзіп, алдыңғы толқын ағалар мен апалармен рухани байланыс үзіліп бара жатқандай. Дәстүр, әдет-ғұрып ұмыт бола бастап, оның орнын ғаламторда жайлаған анайы бейнелер баса бастағандай. Қазіргі қоғамда азғындықты ашық жария етіп, халық бірлігінің біртұтастығын бұзатын дүниелер дәріптеліп жатқандай. Мәдениетіміз құлдырап, құндылықтарымыз құрдымға кетіп бара жатқандай…
Алайда көптің ішінен суырылып шыққан Азамат Ысқақов "Алтын заман" әлеуметтік жобасы арқылы кейінге кетіп бара жатқан көштің бетін бері қаратуға ниетті. 2 жылдай балшық илеуге деген қызығушылығы оянып, ұмыт болып бара жатқан өнерді дамытуды көздейді. Zhasproject Жастар корпусын дамыту жобасы ұсынған байқауға қатысып, 2019 жылдың грнатын жеңіп алады. Нұр-Сұлтан қаласында орналасқан "ДОС Тәуелсіз Өмір Орталығы" Қоғамдық Бірлестігі Азаматтың барлық жұмыстарына қолдау көрсетті. Әлеуметтік жобаның мақсаты – Нұр-Сұлтан қаласындағы әлеуметтік әлсіз топтарынан шыққан жастар мен балалар үшін керамикалық, полимерлі балшықтан жасалған бұйымдар өндірісі бойынша тренингтер өткізу. Сондай-ақ әлеуметтік және шығармашылық шеберхананы ерекше дерті бар балаларға сазды терапия арқылы балшық илеу өнерін үйрету.
Азамат Ысқақов 1990 жылы Ақмола облысы, Целиноград ауданы, Софиевка ауылында дүниеге келіпті. Жақындарының айтуы бойынша тәртіпті, ұялшақ болып өскен. Мектепті ойдағыдай аяқтаған соң колледжды заңгер мамандығы бойынша бітіреді. Бірақ мамандығы бойынша жұмыс істемеген. Мектепте оқып жүрген кезде өз ісін бастауға деген құлшынысы болады. Армандары өте көп еді. Бірақ қай бағытта кәсіп бастауды білмей жүреді. Оның көздегені екі бағыт болады: жасалған дүниелер өз қолынан шықса, және олар адамдарға пайда әкелсе деген. Осылай түрлі шаруаның басын шалып жүріп, ойда жоқта балшық илеу өнеріне тап келеді. Соңғы екі жылын балшық илеумен айналысатын Азамат әлеуметтік кәсіпкерлікті ары қарай дамытатына сенімді. Zhasproject әлеуметтік жобасы аясында Азамат мүмкіндігі шектеулі мен дамуында кінәраты бар балаларға б алшықтан қыш құмыра жасауды үйретеді. Бұл ерекше балалардың ұсақ моторикасын дамытып, психолоғиялық денсаулығын жақсартуда көп септішін тигізетінін Азамат атап өтті.
Арбаға таңулы балалардың қалада тұрып-жүруі қиын. Сол себепті Азамат осындай ерекше балаларды бір орталыққа жинау үшін де біраз еңбек ететінін айтты.
Қыш құмыра жасау арқылы адам кеңістікте еркін жұмыс істейді және сол арқылы оның ойлау қабілетін дамытады. Балшық илеу терапиясы ішкі ресурстарды жан-жақты дамытуға мүмкіндік береді, яғни жүйке жүйесіне жақсы әсер етеді. Сондықтан, керамика шеберханасында жұмыс істеу тек қызықты шығармашылық қызмет қана емес, сонымен қатар хобби ретінде дамып, болашақта бизнес ашуға мүмкіндік беретін кәсіп. Сонымен қатар, балшықпен жұмыс адам бойындағы жағымсыздықты болдырмауға, тәнді босаңсытуға, шиеленісті жеңілдетуге және жай ғана жағымды эмоциялар алуға көмектеседі.
Бір күні "Алтын заман" орталығына зағип жандар келіп, балшықтан түрлі заттар жасайтын болып келістік. Жұмыс барысында мен олардың көңіл-күйін көтеру үшін қызықты әңгімелер айтып, шабыттарын ояту үшін заттардың қандай екенін сипаттап беремін. Сосын бірде бір бала менің бет-әлпетім қандай деп сұрады. Мен өзімді сөзбен сипаттап бергенмен олардың қызығушылығы одан сайын арта бастады. Бір кезде бір зағип бала келіп менің жүзімді сипалап, бет әлпетімнің пішінін сезуге сұранды. Мен өзімді ұстай алмай көз жасыма ерік бердім…
Алдағы күндерге Азаматта мақсат пен арман өте көп. Еліміздегі әлеуметтік кәсіпкерлікті ары қарай дамытып, мүмкіндігі шектеулі жандарға барынша қолғабыс жасауды көздейді. Zhasproject әлеуметтік жобасы ұстанған қағидаттардың бірі – жақыныңа жәрдемдесу, қоғамға пайда әкелу. Азамат өзінің өмірлік ұстанымы дұрыс екеніне және осы жолда аянбай еңбек ететініне сенімді.
Салтанат ӘШІРБАЙ
