Деструктивті діни ағымдар адамдарды өз қатарына тарту үшін интернетте, әлеуметтік желілерде көбінесе мақсатты жарнаманы (таргетинг тәсілін) қолданады. Таргетинг – интернеттегі тұтас аудиториядан тек арнайы көрсетілген критерийлерге сәйкес келетін бөлікті ғана таңдауға және дәл сол қолданушыларға ғана жарнама көрсетуге мүмкіндік беретін механизм.
Әдетте деструктивті діни ағымдар жарнама арқылы діни мәселелер бойынша ақпаратты, діни іс-шаралар туралы хабарламаларды, оқу курстары мен мотивациялық дәрістерді тегін тарататынын айтады. Сондай-ақ дәстүрлі емес діни нанымдағы топтар мен қауымдастықтарды астарлы түрде жарнамалайды. Әдетте хабарландыруға жауап берген адамдардың барлық мәселелері шешілетініне уәде беріледі, оларға әртүрлі көмек көрсетіліп, діни және теологиялық мәселелер бойынша кеңес беріледі.
Қазақстанда ВКонтакте әлеуметтік желісі діни ағымдарды таратудың негізгі платформаларының бірі болып табылады. Психологтардың айтуынша, қазіргі уақытта әлеуметтік желілер адамның жеке мәліметтеріне, қызығушылықтарына толық қол жеткізуге мүмкіндік береді, бұл жағдай деструктивті діни ағымдардың болашақ жақтаушыларын тарту процесін жеңілдетіп отыр.
Негізінен жастар деструктивті діни ағымдардың әсеріне жиі ұшырайды. Діни сауаттылықтың болмауына, психологиялық, отбасылық, өмірлік проблемалардың болуына, жалғыздыққа байланысты адамдар дінге қызығушылық танытуы мүмкін.
Біздің елде осындай деструктивті діни ағымдарға қарсы күрес әртүрлі жолмен жүзеге асуда. Ең алдымен, құқық қорғау органдары тыйым салған ақпараты бар сайттарды, парақшаларды және материалдарды бұғаттайды. Сондай -ақ, жеке азаматтар экстремистік, деструктивті идеологияны насихаттайтын басылымдарға дербес тұлға ретінде де шағымдана алады.
Сонымен қатар, елордамыз Нұр-Султан қаласында бүгінгі күні арнайы құрылған Діндерді зерттеу орталығы жұмыс істейді.
2020 жылы Орталық жүргізген әлеуметтік желілердегі (ВКонтакте, Инстаграм, Facebook және т.б.) деструктивті идеяларды насихаттайтын заңсыз материалдар мен мәтіндерді жариялау бойынша мониторинг нәтижесінде 12 мыңнан астам радикалды материал табылған. Бұл материалдардың деструктивті діни ағымдардың идеологиясын насихаттағаны анықталған. Анықталған деструктивті материалдар бойынша ақпарат құзырлы органдарға жіберілген.
Ал Нұр-Сұлтан қаласы Дін істері басқармасының басшысы Нұрдәулет Әлмұхановтың айтуы бойынша жыл басынан бері 65 -ке жуық деструктивті діни парақшалар анықталған.
«Мұндай парақшалар қазақстандықтарды жиһад және экстремистік ұйымдар идеясымен таныстырып, өз қатарларына қосқысы келген. Біз интернетте осындай парақшаларға жазылған 4 мыңнан астам адамға ескерту жасадық. Биылғы жылы деструктивті діни топтарда тіркелген 2204 адамға әлеуметтік желілердегі деструктивті парақтардан бас тартуды талап ететін ескерту хаты жіберілді. Жыл басынан бері интернет -ресурстар мен әлеуметтік желілерге мониторинг жүргізу барысында радикалды және деструктивті мазмұндағы 12 мыңға жуық материалды анықтадық және оларды одан әрі бұғаттауға бағыттадық. Естеріңізге сала кетейін, күмәнді діни бірлестіктерге жазылу, деструктивті материалдарды тарату Қазақстан Республикасының Әкімшілік құқық бұзушылық туралы кодексінің 453 және 490 -баптарын бұзуға әкеледі. Осы орайда, заңды білмеу – мұндай азаматтарды ақтамайтынын да ескерткен жөн», – дейді басқарма басшысы.
Еске салайық, Қазақстан Республикасы Қылмыстық кодексінің 174 -бабына сәйкес әлеуметтік, ұлттық, рулық, нәсілдік, таптық немесе діни араздықты қоздыру әкімшілік айыппұлға немесе 2 жылдан 7 жылға дейінгі мерзімге бас бостандығынан айыруға жазаланады.
