2024 жылдың 11 айында Шымкент қаласында кәмелетке толмағандарға қарсы жасалған қылмыстар саны 34,2%-ға өскені байқалды. Құқық қорғау органдары бұл өсім ұрып-соғу, ұрлық және жол ережелерін бұзу фактілерімен тікелей байланысты екенін мәлімдеді. Қылмыстардың алдын алу және кәмелетке толмағандардың қауіпсіздігін қамтамасыз ету мақсатында бірқатар маңызды шаралар жүзеге асырылуда, деп хабарлайды Toppress.kz.
Қала прокурорының бұйрығымен құрылған 71 «Мобильдік топ» апта сайын түнгі рейдтер жүргізуде. Жыл басынан бері 512 рейд барысында:
- 5 мыңнан астам кәмелетке толмаған анықталып, олардың ата-аналары әкімшілік жауапкершілікке тартылды.
- 600-ден астам бала бейімдеу орталығына орналастырылды, оның ішінде 553 бала ата-аналарына қайтарылса, қалғандары қамқоршылыққа немесе арнайы мекемелерге жіберілді.
Мобильдік топтар сондай-ақ толық емес және тұрмысы қолайсыз отбасылардың тұрмыстық жағдайын зерттеп, олардың үйлеріне апта сайын барып тексеру жүргізуде. Осы жұмыстар нәтижесінде 1300-ден астам отбасы зерделеніп, 460 отбасына көмек көрсетілді, оның ішінде азық-түлікпен қамту және әлеуметтік көмек беру шаралары бар.
Қаладағы 280 білім беру ұйымдарында 52 мыңнан астам қатысушыларды қамтыған құқықтық түсіндіру жұмыстары ұйымдастырылды.
