Прокуратура органдары «Кибернадзор» ақпараттық жүйесінің көмегімен әлеуметтік желілерде суицидке итермелейтін 32 сайт пен 31 ойынға тосқауыл қойды. Қазіргі уақытта кәмелетке толмағандардың өмірлік қиындықтарға тап болған кезде қайда барып, кіммен ақылдасу керектігін біле алмайтыны жиі кездеседі. Бұл олардың қауіпті қадамдар жасауына себеп болып отыр, деп хабарлайды Toppress.kz.
Осыған орай, прокуратура барлық жасөспірімдерге кез келген мәселелер бойынша психолог мамандарынан көмек алуға шақырды.Сонымен қатар, тұрмыстық зорлық-зомбылық мәселесі өзекті бола отырып, жыл басында Үйлестіру Кеңесі ұйымдастырылып, бұл тақырып кеңінен талқыланып, оның шешу жолдары айқындалды.
Прокуратураның бастамасымен Жұмыспен қамту және әлеуметтік қорғау басқармасының «Бақытты жанұя» орталығында агрессорларға арналған тегін психологиялық көмек көрсету жобасы іске қосылды. Бұл жоба аясында психолог мамандар отбасылық құндылықтарды насихаттап, ата-ана мен баланың арасындағы қарым-қатынасты нығайтуға көмектеседі.
Бүгінде бұл жаңа тәсіл оң нәтиже беріп, орталықтағы психологтар 30-дан астам агрессормен жұмыс жасап, олардың отбасыларында құқық бұзушылықтардың қайталануының алдын алды. Сонымен қатар, орталықтың психолог мамандары «Мобильдік топ» құрамында тұрмыстық зорлық-зомбылықтың алдын алу шараларына белсенді түрде қатысуда.
