Дін мәселелері жөніндегі Республикалық ақпараттық-түсіндіру тобы мүшелерінің қатысуымен 2019 жылдың 14-15 қараша аралығында Қарағанды облысында дін мәселелері түсіндіру жұмыстары жүргізілді. Іс-шараларға білікті дінтанушылар мен тәжірибелі мамандар тартылды. Кездесулер тұрғындар арасындғы әртүрлі топтармен өткізілді. Олардың ішінде студент жастар, әртүрлі мекеме қызметкерлері, оқу орындарының дінтану пәні мен тәрбие ісіне жауапты мамандары және психологтар мен студенттердің жетекшілері, әскери және құқық қорғау қызеткерлері қатысты. Кездесулердің мақсаты қатысушылар мен РАТТ мүшелері арасында сұхбат арқылы Қазақстанның дін саласындағы мемлекеттік саясаты мен зайырлылық ұстанымы, деструктивті радикалды ағымның белгілері мен одан сақтану жолдары, дәстүрлі дін құндылықтарының ерекшеліктерін түсіндіру болып табылады, деп хабарлайды Toppress.kz.
Кездесулерге РАТТ мүшесі ретінде дінтанушы Аханов Жарас Иембергенұлы, "Дінтанушылар конгресі" ҚБ қызметкері Біләлов Серікбол Арғынғазыұлы және ҚМДБ Бас мүфтиінің көмекшісі Аташев Айбек Асқарбекұлы, ҚарМТУ Қазақстан халқы Ассамблеясы және әлеуметтік-гуманитарлық пәндер кафедрасының аға оқытушысы Тусупбеков Жарқын Амантайұлы тартылды.
Кездесулер барысында Біләлов Серікбол "Интернет алаңындағы торға түсіру және оның алдын алу шаралары" тақырыбы аясында "Экстремистік топтар өз идеологисын насихаттау барысында ғаламторды кең қолданатынын және олардың ғаламтордағы белсенді жұмысы өз қатарларын жаңа адамдармен толықтыруда. Желі арқылы ағымдар өздерін жарнамалаудың әртүрлі тәсілін қолданып келеді. Әлеуметтік желілерде өздері жайлы қауесет сөздерді, бейне, дыбыстық материалдарды таратып, үнемі жұрттың назарын аударып отырады. Экстремистік топтар ғаламторда адамдардың агрессиясын туындататын материалдарды жариялайды. Әсіресе діндарлардың ашу-ызасына тиіп, арандататын материалдарды жиі қолданады" деп ойын білдірді.
Аташев Айбек Жазасын өтеу мекемесінде ұйымдастырылған кездесу барысында "Дін – адам мен қоғам өміріндегі ықпалы жоғары құндылық. Ислам адамды Алламен байланыстыратын, адамның қоғаммен жақсы қатынасын түзетін, сондай-ақ жалпы күнделікті өмір сүру дәстүрлерін жаңғыртатын жүйе. Осы себепті мұсылман адамның тұлғасы зайырлы еліміздің құндылықтарын құрметтеуге және дінаралық татулық пен бейбіт өмірге бағытталады" деп ой түйді.
Жарқын Тусупбеков өз саласы аясында Қазақстан халқының көпұлттылығы мен көпконфессиялық құрамына аса мән берді. "Қазақстан ұлттық және діни татулықты басты құндылық ретінде қабылдап, 130-тан астам ұлттар мен 18 конфессия өкілдерінің отанына айнала алды Нәсілдік, тілдік және діни ерекшеліктерімізге қарамастан әлемдік құндылықтарға негізделген ортақ мәдение байланыстарымызды сақтап қалу баршамыздың міндетіміз. Оның шешім жолы – адамдардың бірге бейбіт өмір сүруінің утопия емес екендігін, әралуандықтың адамзаттығ құнды байлығы және қарсыласу оңай, ал, ымыраға келу қиын іс болатындығын қаперде ұстауымыз керек" деп ұлтаралық және жінаралық татулықтың маңызын аша түсті.
Ж.Аханов еліміздің конфессияаралық қатынастардың маңыздылығына тоқтала кетіп "Еліміздің мемлекеттік саясаты азаматтардың құқықтары мен бостандықтарын құрметтеуге негізделген қағидаттарды басшылыққа алады. Сонымен бірге, елдегі қалыптасқан мемлекеттік-конфессиялық қатынастар барлық конфессиялар мен діни топтардың тең құқықтығын қамтамасыз етуге бағытталған. Қазақстанның әлемдік және дәстүрлі діндер лидерлерінің арасындағы сындарлы үнқатысу көпірін құру қадамы осы мақсаттың жүйелі жүзеге асырылуын айқын көрсетіп отыр. Бүгінгі таңда мемлекеттің дін саласындағы саясаты дінаралық келісімді сақтауды, діндердің үнқатысуына серпін беру және қоғамдағы өзара діни төзімділікті насихаттауды көздейді" деп қазақстанның дін саласындағы саясатының бір қырын түсіндіріп кетті.
Жалпы, мұндай іс-шаралар өңір тұрғындарының дін саласындағы сауаттылығын арттырып, діни радикализмнің алдын алу мақсатында ұйымдастырылып, жүзеге асырылады.
