Мемлекет басшысы Қазақстанның болашағы саналатын жастарды қолдау керектігін, жастар мен отбасы институтын кешенді қолдау мемлекеттік саясатының басымдылығына айналуы тиіс екенін айтқан болатын. Жастардың барлық санатын қолдауға арналған шараларды толық қамтитын әлеуметтік сатының ауқымды платформасын қалыптастыру қажеттігін соның негізінде биылғы жылды "Жастар жылы" деп жариялаудың маңыздылығын көрсетті.
Биылғы жарияланған Жастар жылында атқарылатын жұмыстардың бір легі мыналар. "Жас Маман" (100/200) бағдарламасы енгізіліп онда, 200 мың қазақстандық 200 танымал білім беру мекемелерінің базасында 100-ден аса танымал мамандықтар бойынша дайындалады. Сонымен қатар, "Дипломмен ауылға" бағдарламасы бойынша мамандықтардың тізімі кеңейтіледі. Ауылға көшкен жас мамандарға 100 АЕК (252,500 теңге) көлемінде қаржылай көмек көрсетіледі. Бұған қоса, студенттік еріктілерге арналған стипендиялар 30% -ға өседі. Стартаптарды қолдау Қоры құрылады. "Бизнестің жол картасы-2020" бағдарламасы аясында жас кәсіпкерлерге екі есе көлемде гранттар бөлінеді. Жыл сайын Алматы, Астана, Шымкент қалаларында жас отбасыларға жалға берілетін тұрғын үй аясында кем дегенде 1000 пәтер салынатын болады. Біздің елімізде қашықтықтан білім беру саласы кеңейтіледі, бұл үшін Open University жобасы әзірленеді. Жас ғалымдардың қолданбалы ғылыми зерттеулерін қаржыландыруға жыл сайын 3 млрд теңге бөлінеді. Жастар жылы шеңберінде сапалы білім беру, жұмыспен қамтуға жәрдемдесу, тұрғын үй мәселесін шешу, сондай-ақ отбасылық құндылықтарды дамытуға бағытталған шаралар қабылданатын болады.
