Рудный қаласында ERG құрамындағы Соколов-Сарыбай тау-кен байыту өндірістік бірлестігі базасында Еуразиялық Топтың II Спартакиадасы басталды, Baq.kz ақпарат агенттігі.
Ауқымды корпоративтік шараның ашылу салтанаты қалалық “Горняк” стадионында өтті. Спорт мерекесін ұйымдастырушылар қатысушы командалардың салтанатты шеруі, жарық шоуы және театрландырылған көріністен тұратын нағыз қойылым әзірлепті.
Бұл күндері Рудныйдың спорт алаңдарындағы көңіл-күй нағыз Олимпиада ойындарынікінен кем түспей тұр. Тартысты бәсекемен бірге әсерлі сауық бағдарламасын ала келген сынға әсіресе шағын қала тұрғындары риза. Әлеуметтік желідегі жазбаларында олар айтулы шараның тұрғындарға ерекше әсер қалдырып, жұрттың көңілінде көпқа сақталарын баса айтып жатыр.
“Екінші спартакиаданың осында, Рудный қаласында өтіп жатқаны бекер емес. Біз ERG-дің үлкен командасы біртұтас, бірлігі үдайы берік болғанын қалаймыз. Қазақстан бойынша Топ құрамында 60 мың қызметкер бар. Спартакиада шын мәнінде халық мерекесіне айналып отыр”, – деп атап өтті “Еуразиялық Топ” ЖШС Басқарма төрағасы Серік Шахажанов шараның ашылу салтанатында.
Дүбірлі додаға арнайы шақырылған даңқты боксы кіші Рой Джонс кештің арнайы қонағы атанды. Ол көрермендерге жаңа әнін тарту етіп, спартакиаданың үздік спортшысына арналған атаулы қолғабын сыйлады. Жүлде әзірге жарыстың бас төрешісіне тапсырылды.
Топтың қазақстандық өнеркәсіп кәсіпорындарында қызмет етіп жүрген 600 жұмысшы сынға түсіп, күшін байқап көру үшін жарысқа келді. Волейбол, мини-футбол, баскетбол, гір спорты, үстел теннисі, жеңіл атлетика мен шахматтан 10 команда сайыс жолына шықты.
Спартикиадада тартыс қызып келеді, командалардың дайындық деңгейі жоғары екені байқалады. Мысалы, Соколов-Сарыбай тау-кен байыту өндірістік бірлестігі тек жеңіске жетуді жоспарлап отыр екен.
“Бүгін біз топтық кезеңдегі соңғы ойынды ойнадық. «Қазақстан аллюминиі» командасын жеңдік. Мықты команда екен. Әрине, ойынның алғашқы бөлігінде бабымыз келіңкіремеді, бірақ кейін өзімізді қолға алып, ұтып кеттік. Жалпы ұйымдастыру деңгейі мен алған әсеріміз өте жақсы”, – деп пікірімен бөлісті “ССКӨБ” АҚ қызметкері Павел Сапожников.
Еске сала кетейік, “ССКӨБ” АҚ командасы осыдан екі жыл бұрын өткен ERG бірінші спартакиадасының күміс жүлдегері атанған болатын. Жеңімпаздар есімі 17 тамыз күні жарияланады. Жарыстың жабылу салтанатында келесі Спартакиаданың өткізілетін орны мен қабылдайтын кәсіпорын атауы жариялады.
Байрақты бәсекенің басты ұраны: “Спорт – ұжымды ұйыта түседі”. Яғни металлургтер мен кеншілер, энергетиктер мен шахтерлер, тасымал саласы мамандары жарыстан тыс уақытта бір-бірімен жақынырақ танысып, еліміздің төрт тарабында орналасқанымен ортақ табысқа жұмыс істейтін ұжымның бірлігі беки түспек.
